Versión radiofonica d’o blog Tierra de barrenaus. Los lunes de 19 a 20 h. Dende 2006, comunicación en aragonés. Charramos de tot: mosica, politica, frikadas, historia, luenga … Emitir nos fará vencer.
Emisión en Directo
Todos los eventos
TIERRA DE BARRENAUS
Repeticiones
Todos los eventos
TIERRA DE BARRENAUS
|
Dimpués de bell dia sin emitir, torna Tierra de barrenaus. Un programa feito de conchunta con belunas d’as colaboracions que me hetz ninviau las vuestras propuestas mosicals y de textos. Programa de tot home made debiu a la crisi d’o virus, asinas que disculpas por la calidat.
En lo 15eno programa d’a temporada charramos con Guillérmo Tomás, un d’os coordinadors d’a obra “Cultura y poder del Estado en la Corona de Aragón. Historiadores e historiografía en los siglos XIII – XVI” publicada fa bell mes por Prensas Universitarias de Zaragoza. Con ell conoixeremos cómo se recontaba la historia d’Aragón en ixe periodo. En la segunda parte, Cherardo nos presentará lo disco O zaguer chilo 3 y charraremos d’o concierto de presentación que se fació lo 4 de marzo en lo Centro Civico Delicias, con l’actuación de seis d’os grupos que fan parte d’iste disco en aragonés.Tendremos, antimás, una nueva “canción d’antes mas” y mas mosica bien recomendable.A causa d’a crisi d’o coronavirus, buena parte d’o programa s’ha habiu de grabar en casa, asinas que notaretz lo soniu con menos calidat que de cutio.
En lo 14eno programa torna Armando pa charrar d’o viache que fació ta Polonia, a on que podió visitar bell campo de concentración d’a II Guerra Mundial. En la segunda parte, tos proposo cinco libros bien utils pa treballar con l’aragonés en totz los suyos aspectos: gramatica, vocabulario, historia, grafía…La parte mosical la fan una nueva canción “lololo” y un gran grupo con decadas d’historia que visitará Zaragoza iste mes d’abril
Programa adedicau a las nominacions a los XXI Premios d’a Mosica Aragonesa. Repaso y comento las 14 categorías, metendo beluna d’as cancions que ha protagonizau la scena mosical aragonesa de 2019. La gala a on que se conoixerán las ganadoras se celebrará lo 13 de marzo en Uesca
Arriba una d’as fiestas mas populars y con mas tradicions d’o país: lo carnaval. Por toda la nuestra tierra nos trobamos con celebracions a-saber-las de toda mena. En iste programa Dabi, Cherardo, Trallas y yo compartimos experiencias, viaches y disvraces d’os carnavals que hemos viviu y planteyamos bell debat arredol d’istas fiestas.
La fredor no puet con Tierra de barrenaus. Torna t’o programa Ruben, qui nos charra d’o disco Comanchería, de Los Chikos del Maíz. Nos presienta la banda y lo suyo nuevo treballo y parlamos d’o concierto que facioron en noviembre en Zaragoza. En la segunda parte, tos foi cinco recomendacions culturals pa pasar millor istos diyas d’hibierno: cinta, comic, libro, serie y exposición. No t’aburrirás. Y antimás, la canción d’o programa y una nueva canción blasfema!
Barrenau Session. Empecipia un nuevo anyo y inauguramos formato de Barrenau session, programas a on que tos presentaré bella propuesta mosical. La primer, con una triga de bandas que sonarán en 2020 por tener nuevo disco y / u fer chira. Me n’he deixau a-saber-las, pero tiempo tendremos de ir anyadindo-ne.
L’anyo acaba sin Evo Morales en la presidencia de Bolivia dimpués de quasi catorce anyos de mandato que cambioron lo suyo país de tot. Lo golpe d’estau ha deixau quantos muertos y la presencia en lo nuevo gubierno de sectors ultracatolicos y racistas. En la primer parte d’o programa charramos con Diego Marín, autor de “Bolivia, las voces del pueblo” pa que no aclareixca bellas cosas sobre lo que ye pasando-ie.En la segunda, nos sometemos a las fiestas de nadal y tos proposo quatre cancions propias d’istas calendatas que, a diferencia d’os villancicos, valen muito la pena.
Programa bien esportivo. Empecipiamos con escalada. Con Dani y Ruben viacharemos ta Riglos, Ordesa y lo Midi d’Osal y aprendemos bell concepto basico d’ista disciplina. En la segunda parte, una nueva sección sobre running, a on que presiento la triple preba La Cartuja – Espacio Alfranca. En la parte mosical, un nuevo disco d’a banda que lo petará en 2020, y una versión punk d’un tema clasico.
