Tierra de Barrenaus archivos - Página 6 de 16

Tierra de Barrenaus 7×19 Lo Sahara Occidental

8 junio, 2021 No hay comentarios

Los zaguers acontecimientos en la muga de Ceuta han feito reviscolar lo debat arredol d’o Sahara Occidental. La tensión entre los gubiernos espanyol y marroquí ha puyau dimpués de que s’acullise a lo lider d’o frent polisario pa tractar-le la covid. Charramos con Chorche Paniello, historico activista en desfensa d’o pueblo saharaui, qui nos da las claus d’iste conflicto.En l’apartau mosical, ascuitaremos a un cantaire que nos va deixar fa poco y que tenió una gran y larga trachectoria. Tamién sentiremos a una colla que, en un d’os suyos discos mas famosos, decidió versionar en euskera, catalán y gallego lo primer single.

Tierra de Barrenaus 7×18 Falcillas

31 mayo, 2021 1 comentario

Con la primavera plegan t’as nuestras tierras un ciento de visitants que i remanen tot lo verano. Entre ells, las falcillas u falcetas (Apus apus), un muixón chiquet pleno de sorpresas. La nuestra educadora ambiental Tamara Marzo Rins nos parlará d’istas superheroinas que traviesan tot Africa pa pasar aquí bell mes y que tienen una manera de vivir que tos deixará sin sangre en la pocha.Antimás, ficaremos una nueva canción en lo calaixo d’a canción historica y tendremos lo nuevo single d’una cantaire que acaba de visitar Zaragoza en iste reboot de l’actividat de conciertos que somos vivindo en istos meses

Tierra de Barrenaus 7×17 Almugavars

19 mayo, 2021 No hay comentarios

En la edat meya, una companyía de mercenarios levó lo nombre d’Aragón por toda la Mediterrania. La suya manera de luitar en la batalla, y las esferras que feban por astí por a on que pasaban los facioron bien conoixius y temius. Nomás sentir lo suyo nombre, ya feba miedo: yeran los almugavars.En iste nuevo programa entrevistamos a Chusé Bolea, un d’os mayors estudiosos y expertos sobre istos guerrers que plegoron a luitar en puestos tant aluenyaus de casa suya como Bizancio u Atenas. Nos recontará la suya historia y presentará lo suyo nuevo libro “Almugávares. Una aventura medieval de conquistas y traiciones”.En la parte mosical, sentiremos un nuevo duo valenciano que nos traye la suya propuesta bien diferent a lo que se gosa sentir en TdBradio. Lo calaixo de cancions lo ubrimos pa ficar-ie una nueva canción literaria, metendo mosica a un d’os poemas mas polius d’o castellano.

Tierra de Barrenaus 7×16 De viache por la mosica aragonesa

27 abril, 2021 No hay comentarios

Acabamos abril con las celebracions d’o Día d’Aragón y tos proposo un viache por la mosica aragonesa. En la nuestra tierra tenemos talento a-saber-lo y propuestas de toda mena; una gran historia mosical y firme futuro por debant. En iste programa viachamos por belunas d’as mosicas que protagonizan la scena mosical aragonesa. Porque n’i hai tantas que fer-lo por todas sería imposible. I falta chent a embute, pero aquí tenetz cancions de bandas emerchents y d’atras bien consolidadas. Nuevos talentos y nuevos prochectos de chent que leva anyos arrienda fendo mosica. Aragón suena de pistón. Pa sentir buena mosica no te cal salir de casa. Compreba-lo!

Tierra de Barrenaus 7×15 Aniversario Tierra de varrenadas

13 abril, 2021 No hay comentarios

En marzo de 2020, en empecipiando l’encadamiento que provocó la pasa de COVID-19, Arale y yo nos chuntemos pa grabar cada tarde un podcast en aragonés. Faciemos 42 emisions a on que charrabanos d’as cosas que nos iban pasando, por un regular en tono d’humor, y prebando de fer comunidat con todas las personas que nos ascuitetz.Un anyo dimpués, tornamos a chuntar-nos en lo sofá de casa nuestra pa remerar ixe programa, fendo buen charrazo, alcordando-nos d’ixos días, y mirando ent’o futuro con l’asperanza de que ista situación acabe antes con antes.

Tierra de Barrenaus 7×14 Gramatica Basica de l’aragonés y atros libros

7 abril, 2021 No hay comentarios

Dimpués d’a saber qué tiempo aguardando, a la fin tenemos en las nuestras mans, y en formato papel, la Gramatica Basica de l’aragonés. Una obra feita por l’Estudio de Filolochía Aragonesa que fa una descripción bien completa d’a nuestra luenga. Un manual que qualsequier persona que estudie aragonés ha de tener en los repalmars d’a suya biblioteca. Charramos con Juan Pablo Martínez, una d’as personas que ha feito parte d’iste prochecto.En la segunda parte d’o programa seguimos charrando de libros. Tos proposo cinco lecturas de toda mena que aspero que tos faigan goyo. Editorials, autoras y tematicas bien variadas pa pasar d’a millor manera posible lo vuestro tiempo libre.Quanto a la mosica, tos traigo lo nuevo disco d’una banda naixida a finals d’os 90 que torna con toda la rasmia de siempre y firme borina. En lo calaixo de cancions i ficaremos una nueva “canción engarcholada” escrita por un d’os

Tierra de Barrenaus 7×13 Barricada y la Guerra Civil

18 marzo, 2021 No hay comentarios

En 2009 Barricada publicó un d’os suyos zaguers treballos: La tierra está sorda. Facioron d’ixe nuevo prochecto un album conceptual centrau en la Guerra civil espanyola. Deciueito temas que charran de muitas d’as historias que i sucedioron. Beluna bien conoixida y atras no pas tanto. Mario nos charra d’iste disco y d’os sucesos que inspiroron cada una d’as suyas cancions. Antimás, respondo a bell oyent que preguntaba en retz socials por la vichencia d’a conoixida como Lei d’o LAPAPYP, legalment la Ley de uso, protección y promoción de las lenguas y modalidades lingüísticas propias de Aragón.

Tierra de Barrenaus 7×12 O Zaguer Chilo 4 y Sant Pasqual

3 marzo, 2021 No hay comentarios

Ni la pasa puet aturar la creatividat d’as mosicas y los mosicos aragoneses que, un anyo mas, han quiesto aduyar a la supervivencia y difusión d’a luenga aragonesa colaborando con lo prochecto O Zaguer Chilo. Cherardo nos presienta la quarta edición d’iste disco que replega lo treballo de vinte collas que han grabau un tema en aragonés. Con ista, ya son 80 nuevas cancions que cantar en la nuestra luenga.En la segunda parte conoixeremos las barucas d’un cociner y de Sant Pasqual Bailón, lo suyo santo favorito que responde, u no pas, a los suyos rezos.En la parte mosical charraremos, prou que sí, de Pablo Hasel, y ficaremos una nueva canción en unatra luenga en lo calaixo de cancions.

Tierra de Barrenaus 7×11 Calandario scientifico y lupos

18 febrero, 2021 No hay comentarios

Plega un Tierra de barrenaus de rusient actualidat. Empecipiamos con Edu, una d’as personas que ha feito posible lo Calandario Scientifico en aragonés, una iniciativa que nos acerca la historia d’a sciencia cada día a traviés d’os retz socials y que, iste anyo, lo fa tamién en aragonés. En la segunda parte, Tamara nos charra d’as zaguers noticias sobre lo lupo. Los cambios que bi ha habiu quanto a la suya cacera y cómo afecta isto a la especie y tamién a los ganaders, a on que los cambios lechislativos han resultau polemicos.Y antimás sentiremos una canción d’a nueva edición de O zaguer chilo y tendremos una nueva canción engarcholada en lo calaixo de cancions

Bajo los adoquines está la 101.8 FM

Radio Libre

Zaragoza

Síguenos:

En directo

PUNTO AZUL PALIDO / LA ESPIRAL DEL LIBRE PENSAMIENTO

Categoría: Tierra de Barrenaus

Emisión en Directo

Repeticiones

Listado programas

Tierra de Barrenaus 7×19 Lo Sahara Occidental

Tierra de Barrenaus 7×18 Falcillas

Tierra de Barrenaus 7×17 Almugavars

Tierra de Barrenaus 7×16 De viache por la mosica aragonesa

Tierra de Barrenaus 7×15 Aniversario Tierra de varrenadas

Tierra de Barrenaus 7×14 Gramatica Basica de l’aragonés y atros libros

Tierra de Barrenaus 7×13 Barricada y la Guerra Civil

Tierra de Barrenaus 7×12 O Zaguer Chilo 4 y Sant Pasqual

Tierra de Barrenaus 7×11 Calandario scientifico y lupos