Fendo Orella naixió fa bells 9 anyos con a necesidat de fer servir a luenga aragonesa en as ondas y prebar de normalizar-la: charrar de actualidat, mosica, politica, cultura… todas as luitas que cullen en una luenga. Y asinas continamos dando ferrete, programa par de programa, anyo par d’altro.
¡Siente Fendo Orella y fe orella!
Zaguer Fendo Orella d’ista anyada 2011, un programa especial con entrevista a Diago d’a colla Maut, una propuesta mosical que fa mezcla d’o folk y os ritmos electronicos a mans de reconoixius mosicos d’a scena aragonesa. Ascuitemos o suyo treballo 1.0 y en conoixiemos mas d’ista colla en una entrevisteta de muito buen sentir.
Debantzaguer Fendo Orella d’ista anyada 2011, un programa especial sobre a colla Los Draps en fer publico a pasada semana un comunicau de despedida. Repaso a la suya historia, discografia y homenache radiofonico de parti nuestra por a suya mosica y faina social. D’atra man, remeremos a presentacion fa una anyada d’o libro en aragones O despertar de l’onso leyendo un d’os suyos relatos y qualques cosetas mas.
China-chana l’anyo va acotolando-se, en iste debant de debantzaguer programa de 2011 teniemos noticietas de l’aragones, asturiano, represion con a detencion d’o periodista Edu Leon, 20 d’aviento en Zaragoza y Uesca, pobreza infantil, respuesta d’o SAT a Cayetano de Alba y regalemos papeletas t’a rifa en refirme de Xaloa Telebista, television d’a que tos charremos fa bells programas. Mosicalment presentemos o nuevo treballo de Kase.O, Jazz Magnetism, y traduciemos una canta suya a l’aragones ta rematar o programa. Remera que emitimos totz os chueves en Radio Topo, 101.8 d’a freqüencia modulada zaragozana, de 18 a 19 horas. Y que tamien puedes ascuitar-nos en directo en o ret a travies d’a web de Radio Topo u en as reemisions de Radio Chabolo 107.6 FM os viernes de 17 a 18 horas.
