Primer programa d’iste marzo de primaveral orache, en o bell meyo d’as primers calors y d’una morfuga de movilizacions socials, terne que terne…
Prencipiemos con uns versos de Roberto Cortes y nos acompanyo a mosica de Rojo directo, treballo en directo d’a colla castellana Rojo Cancionero y Banderas Rotas.
Terne que terne, os entibos continan estando noticia. Tos leyemos a cronica d’AraInfo d’a protesta y chicota victoria d’os vecins d’Artieda contra l’entibo de Yesa, empachando a dentrada en o lugar d’a CHE y a sinya d’as actas d’expropiacion. Tot charrando d’entibos, femos alcordanza con un texto d’o libro Jánovas, víctimas de un pantano de papel d’a esferra d’un ells que nian plego a construyir-se.
Terne que terne, os retalles y reformas continan estando noticia. Movilizacions d’estudiants de barra a barra d’Aragon en esfensa de l’amostranza publica, y tamien contra a reforma laboral.
Terne que terne, as luengas continan estando noticia, y en Aragon nunca no’n son buenas. Plegan os retalles en una feble y esvafada Lei de lenguas que encara no s’heba aplicada, una nueva lei de “modalidatz lingüisticas” que rebla luen d’os criterios scientificos.
Despidiemos o programa con una noticieta sobre o Diario Publico y unatra d’o Laton d’a Fueva, y remerando-tos que o venient lunes toda Radio Topo salimos d’o nuestro cado ent’a Cincomarzada, ta trobar-nos-ie y fer-nos qualcosa.
Con a sabor a dignidat d’a chent d’Artieda y en homenache a la suya luita, a canta traducida ista semana ye La Habanera triste de La Ronda de Boltaña.
Podcast: Reproducir en una nueva ventana | Descargar
Suscríbete: RSS
